శాస్త్ర విజ్ఞానము

అంతే కాదు ఈ మహమ్మారి యంత్రం రాబోయే శతాబ్దాలలో ముద్రించాల్సిన విషయాలని కూడా ముద్రిస్తుంది. ముద్రణ యంత్రంలో తిరిగే సిలిండరు మీది నుండి రాజరాజనరేంద్రుడి కాలపు కవిత్వమే కాదు, భవిష్యత్తులో జరగనున్న వైజ్ఞానిక ఆవిష్కరణలు, క్రీ.శ. 2154 లో స్వాతంత్ర్య దినోత్సవ సందర్భంగా ప్రధాని ఇచ్చిన ఉపన్యాసం, క్రీ.శ. 2334 లో గ్రహాంతర యానంలో జరిగిన ప్రమాదాల నివేదికలు మొదలైన విశేషాలన్నీ ఇంపుగా కాగితం మీద ముద్రితమవుతాయి. మానవ మేధ ఇంకా ఊహించిన చిన్న కథలు, చిట్టి నవళ్ళు ఎన్నో ఆ ముద్రణ యంత్రం నుండి వెలువడతాయి. అలాంటి మహత్తరమైన ముద్రణ యంత్రాలని తమ నేల మాళిగలలో దాచిపెట్టుకున్న ప్రచురణ కర్తలు చేయాల్సిందల్లా ఒక్కటే. యంత్రం నుండి ఊడి పడ్డ సమాచారంలో ఏది నాణ్యమైనదో, ఏది నాసిరకందో పరిశీలించి మేలైన విషయాలనే ప్రచురించడం.





ఇలా చేస్తే ఎంత బావుంటుంది కదా?

ఇదసలు సాధ్యమేనా?

సాధ్యమైన ప్రతీ అక్షరకూర్పుని ముద్రించాలంటే ఆ యంత్రం మొత్తం ఎన్ని వాక్యాలు ముద్రించాలో ఓ సారి గమనిద్దాం.

ఇంగ్లీష్ లో మొత్తం 26 అక్షరాలు (A,B,C…) ఉంటాయి. పది అంకెలు (0,1,2…) ఉంటాయి. ఇవి కాక 14 సామాన్యమైన వ్యాకరణ చిహ్నాలు (.,;?! మొదలైనవి) ఉంటాయి. మొత్తం 50 చిహ్నాలు. సగటు ముద్రిత వాక్యంలో 65 స్థానాలు ఉంటాయి. వాటికి సంబంధించి ముద్రణ యంత్రంలో 65 చక్రాలు ఉంటాయి. ఒక వాక్యంలో మొదటి చిహ్నం వీటిలో ఏదైనా కావచ్చు. అంటే ఇక్కడ మొత్తం 50 సాధ్యతలు ఉన్నాయి. రెండవ అక్షరం కూడా ఏదైనా కావచ్చు. అంటే రెండు అక్షరాలని తీసుకుంటే మొత్తం 50X50 = 2500 సాధ్యతలు ఉంటాయి. ఇలాగే వాక్యంలో ఉండే మొత్తం 65 స్థానాలని తీసుకుంటే = 50X50X (65 సార్లు)

= 50^65.

దీని విలువ సుమారు =

10^110.



ఈ సంఖ్య ఎంత పెద్దదో గుర్తించాలంటే విశ్వంలోని ప్రతీ పరమాణువు ఓ మహత్తర ముద్రణ యంత్రానికి సంకేతం అనుకుందాం. అవన్నీ ఏకకాలంలో ముమ్మరంగా పని చేస్తున్నాయని అనుకుందాం. అంటే మొత్తం 3x10^74 యంత్రాలు ఒక్కసారిగా పని చేస్తున్నాయన్నమాట. అంతే కాక ఈ యంత్రాలన్నీ సృష్టి ఆరంభం దగ్గర్నుండి నిరంతరాయంగా పని చేస్తున్నాయని అనుకుందాం. అంటే గత 3 బిలియన్ల సంవత్సరాలుగా, అంటే 10^17 సెకన్ల కాలంగా పని చేస్తున్నాయి. అంతేకాక ఆ ముద్రించే వేగం కూడా పరమాణువుల స్పందన వేగానికి సరితూగేలా సెకనుకి 10^15 వాక్యాల చొప్పున ముద్రిస్తున్నాయి. ఆ స్థాయిలో ముద్రిస్తూ వస్తుంటే ఇప్పటి దాకా ముద్రించబడ్డ వాక్యాల సంఖ్య,

(3x10^74) x (10^17) x (10^15)= 3x10^106



ఇది కేవలం ఇందాక మనం అంచనా వేసిన మొత్తం వాక్యాల సంఖ్యలో కేవలం ఒక శాతంలో ముప్పయ్యవ వంతు మాత్రమే.

పోనీ అంత సమాచారాన్ని ముద్రించినా అందులే పాలేవో, నీళ్లేవో నిర్ణయించి వేరు చెయ్యడానికి ఇంకెంత సమయం పడుతుందో?

(పైన ఇచ్చిన అంచనాలలో విశ్వం యొక్క వయస్సు అంచనా (మూడు బిలియన్ల సంవత్సరాలు) ఆధునిక అంచనాల (13.77 బిలియన్ సంవత్సరాలు) కన్నా చాలా తక్కువ. – అనువాదకుడు)



(ఇంకా వుంది)